2 Kings 4

Meigongnu’ Sathau

1Kamsang honte lakah mi khat zi Elisha tungah kiko a, “Na nasempa ka pasal si hi. Amah in TOPA a zahtak lam na thei hi. Ahi hangin tu-in a leibatnate in ka tapa nihte a sila dingun a la dingin hong kuan ding uh hi,” a ci hi.

2 Elisha in tuanu kiangah, “Nang hong bangci huh ding ka hi hiam? Na inn sungah bang nei na hiam, hong gen in,” ci-in a dawng hi.

Tuanu in, “Na nasemnu in sathau tawmno longal bangmah a nei peuhmah kei hi,” a ci hi.

3 Elisha in, “Pai inla na vengte beelhawm kawm kawikawi in. A tawm lua kawm kei in. 4Tua ciangin nang le na tapate inn sungah inn kikhakkhum un. Beelte khempeuh sungah sathau sung unla a dim masa a pang khatah koih un,” a ci hi.

5 Tuanu in amah paisana tua khit ciangin amah le a tapate kong a kikhakkhum uh hi. Amaute in tuanu kiangah beelte puak uh a, tuanu in a sungsung hi. 6Beelte khempeuh a dim khit ciangin a tapa kiangah, “A dang khat hong puak in,” a ci hi.

Ahi hangin tuapa in, “Beel dang om nawn lo hi,” a ci hi.

Tua ciangin sathau a luang nawn kei hi. 7Pasian mipa kiangah tuanu pai-a, tuapa in, “Pai in, sathau zuak inla na leibate loh in. A om lai tengin nang le na tapate na nungta thei ding uh hi,” a ci hi.

Shunemte’ Tapa Nungtakiksak

8 Ni khat Elisha Shunem ah a pai hi. Tua lai-ah a cithei numei khat oma, tuanu in ama inn ah omin, an a nek ding a kun hi. Tua ahi ciangin amah in tua lai a tot simin an ne dingin a khawl hi. 9Tuanu in a pasal kiangah, “Hih i lampi tawna hong pai pahpah pa Pasian misiangtho ahilam ka thei hi. 10Inn khum tungah inndei khat bawlsak inla a sungah ama ading lupna khat, sabuai khat, tutphah khat le meivak khat koihsak ni. Tua hileh ei kiangah hong pai simin amah tua lai-ah om thei ding hi,” a ci hi.

11 Ni khat Elisha a pai ciangin ama inndei sungah lut a, tua lai ah a lum hi. 12Amah in a nasempa Gehazi kiangah, “Shunem numei va sam in,” a ci hi. Tua ciangin amah in tuanu sama, tuanu a mai-ah a ding hi. 13Elisha in tuapa kiangah, “Tuanu tungah gen in, ‘Ko ading na khempeuh na lunghimawh hi. Tu-in nang bang hong kihihsak ding hiam? Nang tangin kumpipa ahi a galkap mangpa tung ahi zongin kong gensak ding uh a om hiam?’ ci in,” a ci hi. ^a

Tuanu in, “Ka mipihte lakah inn nei khat hi buang ing,” ci-in a dawng hi.

14 Elisha in, “Tuanu ading bang kisepsak ding hiam?” ci-in a dong hi.

Gehazi in, “Pha hi, a pasal lah tekta a, ta pasal a nei kei hi,” a ci hi.

15 Tua ciangin Elisha in, “Tuanu sam in,” a ci hi. Tua ciangin amah in tuanu sam a, kongka lai-ah a ding hi. 16Elisha in kumkik ciang tu hunin na angah tapa khat na tawi ding hi,” a ci hi. ^b

Tuanu in, “Hikei, ka topa aw, na nasemnu mapi khial dah in, Pasian mipa aw,” ci-in a nial hi.

17 Ahi hangin numei in naupaii-a, Elisha gensa bang tektekin a kumkik ciang tua hun pawlin tapa khat a suak hi.

18 Naupang golta a, ni khat an late laka om a pa kiangah a va pai hi. 19Amah in a pa kiangah, “Ka lutang! Ka lutang!” a ci hi.

A pa in nasem khat kiangah, “A nu kiangah va gen in,” a ci hi. 20Nasempa in amah domin a nu kiangah a puak khit ciangin, a nu in a angah sun dong tawi-in, tuateh amah si hi. 21Tuanu kahto a, Pasian mipa lupna ah sialin, kong khaknelhin a paikhia hi.

22 Tuanu in a pasal sam-a, “Pasian mipa kiangah pai mengmengin kong kileh kik theih nadingin hehpihna in nasemte khat laa tawh hong sawl dih in,” a ci hi.

23 Tuapa in, “Bang hangin tuni-in pai ding na hi hiam? Kha Thak lah hi lo a Sabbath ni zong a hi kei hi,” a ci hi. ^c

Tuanu in “Phamawh kei,” a ci hi.

24 Amah in laa tutphah vawhin a nasempa kiangah, “Masa in; kong gen kei leh kei cihna-in ol paisak tuan kei in,” a ci hi. 25Tua ciangin tuanu paikhia a, Carmel Vum a Pasian mipa omna a tung hi.

Pasian mipa in tuanu a galmuh ciangin amah in a nasempa Gehazi kiangah, “En in! Hua lai-ah Shunem numei hong pai hi! 26Amah dawn dingin va tai inla, ‘Na dam hiam? Na pasal a dam hiam? Na naupang a dam hiam?’ ci-in va dong dih in,” a ci hi.

Tuanu in, “Dam kim ung,” a ci hi.

27 Mualtung a Pasian mipa kiangah tuanu a tun ciangin a khete a len hi. Amah sawnkhia dingin Gehazi pai hi, ahi hangin Pasian mipa in, “Tuaci omsak lel in! Lungzinna mahmah khat nei hi, ahi hangin TOPA in kei kiang panin sel-a bang hong im hiam cih hong gen nai lo hi,” a ci hi. ^d

28 Tuanu in, “Ka topa aw, tapa hong ngen ka hi hiam?’ Ka lametnate sangkhai dah in’ hong ci hi lo ka hi hiam?” a ci hi.

29 Elisha in Gehazi kiangah, “Na kawng gakin na puantualpi gak inla ka ciangkhut tawi-in va tai in. Mi khatpeuh tawh na kituah leh hopih kei inla, mi khatpeuh in hong hopih leh zong dawng kei in. Naupang maitangah ka ciangkhut va nga in,” a ci hi. ^e

30 Ahi hangin naupangno’ nu in, “TOPA nuntak na le nangma nuntakna lo in ka cih inah nang kong paisan kei ding hi,” a ci hi. Tua ciangin amah dingin tuanu a zui hi.

31 Gehazi na ma pai-a naupang maitangah ciangkhut a koih hangin awging khat dawnkikna khat beek a om kei hi. Tua ciangin Elisha dawn dingin Gehazi kileh kik a, ama kiangah, “Naupang khanglo tuan lopi,” a ci hi.

32 Tua inn ah Elisha a tun ciangin ama lupna tungah naupang a sisa in a na lum hi. 33A sungah lut-a, amau gel bek a sungah omin kong khaka TOPA tungah thu a ngen hi. 34Tua ciangin lupna tungah kahto a, naupangno kam le ama kam, a mit le ama mit, a khut le ama khut sutuahin a tungah a bok hi. Tua bangin a tungah a kikhuan ciangin naupangno pum a lum hi. 35Elisha paikhia-in, innkhan sungah kileh kawikawi a, tua ciangin lupna ah kahto leuleu a, ama tungah khatvei a kikhuang lai hi. Naupang sagih vei hechiai in a hak hi.

36 Elisha in Gehazi sam a, “Shunem numei sam in,” a ci hi. Aman a sam hi. Tuanu a pai ciangin, amah in, “Na tapa la in,” a ci hi. 37Tuanu a sungah tumin a khe phungah puka lei lamah a kunsuk hi. Tua ciangin a tapa la-a a paikhia hi. ^f

Beel Sungah Sihna

38 Gilgal ah Elisha kileh kika, tua kualah kialpi a tung hi. Kamsang honte amah tawh thu kikumin a om laitakun, ama nasempa kiangah, “Beel lianpi suang inla hih mite ading meh tuihuan in,” a ci hi. ^g

39 Amaute khat lopaang ah paikhia a loteh a khop le vataak-um gui khat a mu hi. A gahte kaikhawma a puantual dimin a tun hi. A tun kik ciangin atnen a meh huanna lakah a khah hi; ahi zongin kuamah in tuate bang hiam, cih a thei kei uh hi. 40Mite adingin a meh huan uh thuk uh a, ne dinga a kipat uh ciangin, “Pasian mipa aw, beel sungah sihna om hi!” ci-in a awng uh hi. Tua ciangin a ne thei kei uh hi.

41 Elisha in, “Annel tawm hong la dih un,” a ci hi. Beel sungah kha a, “Mite nek dingin lui in,” a ci hi. Tua ciangin beel sungah a nasak thei bangmah a om nawn kei hi. ^h

Zakhat Vakna

42 Baal Shalishah panin mi khat hong pai-a, Pasian mipa tungah anpal tawh kibawl mangbuh-ham emsa lum sawmnih le buhthak vui pawlkhat a puak hi. Elisha in, “Mite nek dingin lui in,” a ci hi. ⁱ

43 A nasempa in, “Mi zakhat mai-ah hih bangci lui vet ding ka hi hiam?” ci-in a dong hi.

Ahi hangin Elisha in, “Mite nek dingin lui in. TOPA gen hih ahi hi: ‘Amaute in ne ding uh a, a khamval lai ding uh hi,’ ci hi,” a ci hi. 44Tua ciangin amaute mai-ah lui-a, amaute in ne in TOPA thu mah bangin a khamval lai uh hi. ^j